القرين

 يعني ايه قرين؟! وممكن القرين يؤذي صاحبه؟! 

كلمة قرين تعني ( الرفيق الدائم ) ولكل شخص فينا قرين ؟ القرين يلزمك من اول يوم اتولدت فيه! مش احنا بنشوف العيل اول ما بينزل من بطن أمه بيصرخ ، طب سألت نفسك ليه بيصرخ؟! بيصرخ لأن قرينه اللي بقى رفيق ليه ضربه! فأحنا بنأذن في ودنه اليمين تلات مرات و الودن الشمال تلات مرات حماية ليه من القرين !

القرين ده بيكون من ( الجن ) بيكون كافر! طب القرين ايه مسؤوليته؟! القرين مسؤول عن الوسوسة؟! يعني بيحثك انك تعمل اي حاجة غلط ، متصليش ، او انك تعمل ذنوب وتعصي ربنا! هو ده اللي بيعمله القرين انه يحثك انك تعمل كل شيء غلط!.. 

يبقى لكل إنسان قرين كافر إلا سيدنا محمد ؟! سيدنا محمد الوحيد اللي قدر يخلي قرينه يبقى مسلم ، غير كده كل حد فينا ليه قرين بس كافر!.. 

كمان الانسان ليه اتنين قرين؟! قرين كافر مسؤول عن الوسوسة باي شيء يعصي ربنا ، أما التاني بيكون ملاك مسؤول عن محاربة القرين الكافر وحمايتك انت منه؟! لكن ده راجع ليك؟ يعني لو انت ايمانك قوي يبقى قرينك اللي هو الملاك المسلم هيبقى قوي وهيقدر يتغلب على القرين الكافر ، لكن لو انت ايمانك ضعيف يبقى القرين اللي هو الملاك المسلم هيبقى ضعيف مش هيقدر يتغلب على القرين الكافر!.. 

يبقى القرين ( شيطان ) مميز في عالم الجن ، ولكل إنسان قرين من الشياطين بيتخلق مع خلقه ، ومش بيموت الا بموت صاحبه ، وهو مصدر الشر ومسؤول عن الوسوسة بعمل المعاصي.. 

من أهم المميزات اللي بيتميز بيها القرين انه اقوى من اي شيطان ! وكمان عارف كل نقطة ضعف فيك ، يعني عارف ازاي هيقدر يدخلك ، عارف الضعف فين وهيروح له ، مش كده بس ، مفيش سحر هينجح غير بمساعدة القرين؟ يعني حد عايز يعملك سحر هيروح للدجال ، الدجال هيطلب المساعده من قرين الشخص اللي هيتعمله السحر ، وبعدها يتم السحر باستخدام القرين! وده بيتسمى سحر القرين اقوى انواع السحر بيتم تسليط القرين على صاحبه وده بيسبب له اذى كبير!.. 

هو القرين شكله ايه؟! وهو فعلا شبهك بظبط زي ما بيتقال؟! 

القرين ليه شكل مميز بيميزه عن باقي الشياطين ؟ فمثلا الانس اشكالهم متقاربة ، لكن اشكال جنوب شرق آسيا زي الصين واليابان وكوريا اشكالهم مختلفة ومميزة بين البشر ؟ وجنوب افريقيا مختلفين عن شمال افريقيا ... هو بظبط الجن كده أشكالهم مختلفة ، والقرين مميز عن باقي الشياطين ، وبيكون أسود!..  

المسافة اللي بين الإنسان وقرينه بتعتمد على قوة ايمان الانسان نفسه ؟ يعني على حسب ايمانك بيتحدد مسافة القرين ليك!.. لكن القرين بيبعد عن جسد الانسان بمسافة 800 م وممكن تفضل المسافة دي زي ما هي ، وممكن يقرب اكتر لدرجة انه يلبس جسمك! وهنا بيكون حالة ( المس ) وده مش بيحصل غير عن طريق السحر أو أن إيمانك ضعف زيادة عن اللزوم ف القرين هنا بيمسك وبيكون مسيطر على افعالك!.. 

تعالوا نرجع بالزمن وتحديدا في عصر حضارة المصريين القدماء ، فكرة القرين كانت موجودة ايام المصريين القدماء ، كانوا بيعتقدوا أن في صورة أخرى بتسكن في جسم الانسان وتسمى " كا " أو القرينة اللي بتتولد مع كل مولود ياتي الى الحياة ، وهي صورة عن الانسان بتقوم بحمايته ، فلو مات بتروح معاه الى قبره وهناك بيكون ليها عمل آخر ، ف القرينة بتقترن بالانسان و مش بتفارقه ، وكمان بيؤمنوا المصريين القدماء أن هناك صراع داخلي بين القرين الشرير والقرين الطيب.. 

في المعتقدات الشعبية من وقت ما نزل الإنسان على الارض بان فيه قرين بتتمثل في ( روح شريرة ) أو ( جنية شريرة ) بتتمثل بصور واشكال مختلفة ، ومن هنا بدأ الإنسان يستخدم وسائل للوقاية منها والابتعاد عن شرها؟ وده جزء من الأساطير الشعبية مثلا: ان يلبسوا المولود الذكر ملابس فتاة ووضع حلقة معدنية في قدمه واستخدام البخور عشان يحموا المولد من الأرواح الشريرة! كمان رفة العين دليل على أن هناك مكروه هيحصلك! او رش الملح يجلب النحس ، او عدم النظر لأعين القطط السوداء عشان بتكون شيطان متمثل في شكل قطة !..  

كمان لو انت كلمت نفسك او تخيلت اشياء مثلا لما تقف امام المرايا وتسأل نفسك " أنا شكلي حلو " هنا ممكن ان يقنعك قرينك أن لون الملابس مش لايقه عليك ، لكن بعدها بتقول " لأ انا شكلي حلو واخر شياكة !"..